ФК ОХРИД ТОП ТИМ

Охриѓани денес беа домаќини на струшки Караорман во последното коло од есенската полусезона на ФФМ Младинската лига за играчи родени 2002 година. Фудбалерите на двете екипи понудија вистински дерби натпревар за уживање, со повеќе голови и неколку пресврти.

Почетокот на натпреварот им припадна на „Белите“ кои вршеа постојан притисок на гостинскиот гол и создаваа шанси кои не ги користеа. Кон средината на првото полувреме, нашиот напаѓач излезе очи во очи пред противничкиот голман и грубо, со боречки зафат од зад грб, беше соборен од противнички играч. Главниот судија, спротивно на фудбалските правила, не го санкционира прекршокот со директен црвен картон. Без оваа судиска грешка извесно е дека натпреварот ќе имаше поинаков тек. Пред крајот на првиот дел, стружани успеаа да постигнат погодок и на полувреме се отиде со резултат од 0:1.

Нашите повторно започнаа поангажирано на стартот од вториот дел од натпреварот и со два погодоци во противничката мрежа, успеаа да го свртат натпреварот во сопствена корист. Сепак, несватливиот пад на концетрација на нашите играчи од одбраната, го искористија стружани и со три погодоци во само пет минути дојдоа до водство од 2:4. До крајот на натпреварот, успеавме уште еднаш да ја затресеме мрежата на противникот за минимален пораз и конечни 3:4.

Честитки за сите фудбалери што оваа полусезона ги бранеа боите на ФК ОХРИД ТОП ТИМ. Следното коло од лигата ќе се игра во втората полусезона што ќе започне во пролетниот дел.

Уживајте во дел од моментите на натпреварот „уловени“ со објективот на Михаил Постолоски,

Викендов се одиграа натпреварите од шестото коло од ФФМ Детската фудбалска лига - Југозападен регион. Повторно следевме атрактивни и ефикасни натпревари во сите генерации. 

​Ова коло, најубедливи беа генерација 2004 која со високи 19:0 ја совлада екипата на Лабуништа. Висока победа против кичевска Ускана од 8:0 извојува и генерација 2009, а убедливи беа и генерација 2007 кои со 3:1 беа подобри од охридски Еврофудбал 2 Вардар. Во еден добар и цврст натпревар со истиот противник во генерација 2005, по неколку неискористени шанси загубивме со 0:2, додека слаб натпревар, под своите можности одигра генерација 2006 која заслужено беше поразена со 1:7 во езерското дерби од струшки Караорман.

Фудбалерите на ОХРИД ТОП ТИМ повторно ги полнеа противничките мрежи и во натпреварите од петтото коло од ФФМ Детската лига што се играше во Кичево. Иако се доцнеше речиси по еден час за почеток на натпреварите, сепак тоа не ги спречи нашите момци да останат концентрирани и да остварат три убедливи победи со доста погодоци против Париз, Велешта и Евро фудбал 2 - Вардар.

Генерација 2004 со четири погодоци во противничката мрежа го совлада кичевски Париз. Рутинирана победа против Велешта имаше генерација 2006 која шест пати стрелаше во мрежата на противникот. Ова коло, повторно најефикасна беше генерација 2008 која постигна 8 убави гола во сигурната победа против охридски Еврофудбал 2 Вардар.

Генерација 2005 одигра одлично второ полувреме против кичевски Париз во кое постигнаа два погодоци, но на крај тоа не беше доволно за победа.

Фудбалерите на ОХРИД ТОП ТИМ беа исклучително расположени за постигнување на голови во четвртото коло од ФФМ Детската фудбалска лига. Нашите момци постигнаа повеќе од 40 погодоци во само пет натпревари.

Генерација 2006 постигна 11 гола и без ниту еден примен убедливо ја совлада А екипата на ФК Велешта. Доминатна игра против Ускана од Кичево имаше и генерација 2005 која постигна 12 а прими само два гола. Најефикасни беа генерација 2008 која против истиот противник постигна 15 погодоци без да прими ниту еден гол. Противничките мрежи ги стрелаа и генерација 2007 која одигра одлично второ полувреме и не искористи многу гол прилики против кичевски Париз. Двата погодоци не беа доволни за позитивен резултат во оваа генерација која прими четири гола од прекин. Два пати противничката мрежа ја тресеше и генерација 2009 која на крајот испушти сигурна победа и одигра нерешено со охридски Оск фер плеј.

Честитки за сите наши фудбалери за одличната и ефикасна игра. Беше вистинско задоволство да се следи нивната игра ова коло.

Нов забележителен настап на нашите фудбалери во третото коло од ФФМ Детската фудбалска лига. Нови победи забележаа ген. 2005, 2006 и 2009. Генерација 2004 минимално беше поразена во дерби натпреварот со минатогодишниот шампион ФК Велешта во натпревар во кој ние доминиравме и постигнавме три погодоци но гостите ги користеа своите шанси за гол повеќе. Генерација 2005 го доби натпреварот со ФК Караорман со 0:3, а од истиот противник беше поразена генерација 2007. Одличен меч одигра генерација 2006 која убедливо ги надигра кичевски Париз со високи 8:0. Генерација 2008 одигра ефикасно со Ла масиа но не успеа да го добие натпреварот, а генерација 2009 убедливо, со повеќе голови разлика ја совлада кичевска Ускана.