ФК ОХРИД ТОП ТИМ

Измина една преубава година за нас. Година што ќе ја паметиме по убави работи. Почнавме скромно, но мошне подготвено, кога веројатно беше најтешко да се почне. Знаевме дека пред нас е голем предизвик за да го најдеме своето место меѓу фудбалските клубови во Охрид. Верувавме во нашиот труд и во нашата идеја да направиме клуб во кој ќе дадеме се' од себе секое наше фудбалерче да биде среќно и дека ќе се потрудиме да создадеме генерации кои ќе ги красат добри човечки особини, а потоа и врвни спортски вештини.

Првиот тренинг се одржа во тешки временски услови кога буквално не’ „зафати“ дождливо невреме. Но, ние не се откажавме. Она што уште повеќе не мотивира  е тоа што седум деца и некои од нивните родители се појавија на тој тренинг и покажаа дека веруваат во она што го правиме. Оттогаш, се’ беше полесно. Следниот тренинг имавме двојно повеќе фудбалерчина, а нивниот број од ден на ден растеше. Денес може да се пофалиме дека веќе претставуваме респектабилна фудбалска школа во која членуваат околу 50 члена. Бројка која зборува дека со нашата работа ја заслуживме Вашата доверба. Се разбира, ова само ја зголемува нашата обврска да работиме уште попосветено, постојано оправдувајќи ја веќе стекнатата доверба.

Покрај тоа, изминатиов период клубот максимално функционално и организационо зајакна и ги доби сите неопходни решенија и дозволи за работа. Агенцијата за млади и спорт ни додели Решение за вршење дејност спорт – фудбал, а во меѓувреме станавме членка на Фудбалската федерација на Македонија, Општинскиот фудбалски сојуз и Сојузот на спортови на град Охрид.

Иако постоиме само половина година, веќе одржавме над 100 тренинзи во изминатиов период и одигравме околу 100 натпревари во сите возрасни категории. Бевме дел од три меѓународни фудбалски турнири каде игравме и меѓународни натпревари, како и од еден турнир во мал фудбал. Остваривме неколку гостувања во други градови од нашата земја како Скопје, Битола, Дебар итн. Нашиот клуб, со 5 генерации доста успешно се натпреварува и во Детската фудбалска лига во организација на ФФМ. Покажавме и дека знаеме да бидеме хумани, активно вклучувајќи се во хуманитарните акции што ги организира Црвениот крст и Општина Охрид, притоа донирајќи и средства за дечиња од социјално загрозени семејства.

Поставените стандарди во годината што изминува ќе ни бидат основа и патоказ за наредната. Слабостите кои ги имаме ќе се обидеме да ги надминеме и посветено ќе работиме на сите активности што се предвидени за следната година.

На крај, Ви благодариме што верувате во нас и посакуваме следната година на сите да ни биде уште поуспешна и во 2015 да влеземе полни со здравје, љубов, мир, спокојство и се разбира многу среќа!

НЕКА ВИ БИДЕ СРЕЌНА И БЕРИЌЕТНА НОВАТА ГОДИНА!

Вечерва, во прекрасниот амбиент што го нуди lounge bar NОА на брегот на езерото, ФК ОХРИД ТОП ТИМ организираше свечен коктел за родителите и пријателите на клубот. Во топла и релаксирана атмосфера, присутните имаа можност подетално да се запознаат со сработеното во годината што изминува и им беа презентирани дел од програмата и плановите за следната година. Голема благодарност до сите родители кои во неформалните разговори искажаа максимална поддршка и задоволство од работата на клубот. Им благодариме и на сите оние кои на било каков начин во изминатиот период не’ помагаа и со своето присуство ја потврдија својата поддршка кон она што до сега го работиме. Исто така им благодариме и на кафе бар НОА затоа што се погрижија сите гости да се чувствуваат удобно и да уживаат во дел од нивните специјалитети. На свеченоста беа доделени и неколку Благодарници и Признанија за сите што дадоа свој придонес во развојот на клубот. 

Повеќе од 40 млади фудбалери од ФК ОХРИД ТОП ТИМ оваа сабота беа дел од Новогодишниот генерациски турнир што се играше во СЦ Климент Колески во Охрид. Во максимално релаксирана, спортска и другарска атмосфера, нашите фудбалери ни подарија еден мошне убав ден во кој презентираа многу од фудбалските вештини што ги изучуваат во нашата школа.

Турнирот на кој настапија речиси сите деца од нашиот клуб беше организиран во три дела. Во првиот дел меѓусебен натпревар одиграа најмалите од генерација 2007/08 и помлади. Во вториот дел од турнирот настапија три екипи од Генерации 2004, 2005 и 2006 и се одиграа три натпревари, секој со секого. По истиот систем на натпреварување играа и највозрасните и тоа комбинирана екипа Генерација 2001/03, Генерација 2002 и Генерација 2004.

Она што го одбележа овој турнир е изобилството убави и атрактивни акции, индивидуални фудбалски вештини, прекрасни голови и ... и се разбира многу забава и дружење. Веселото расположение беше надополнето со трофеите што секоја екипа што беше дел од овој турнир ги доби. Тоа беа неколку пакетчиња „благо“ што на крајот од натпреварите момците несебично ги поделија меѓу себе.

За тие што немаа можност лично да уживаат со нашите фудбалерчиња, може да ја погледнат галеријата со слики за да почуствуваат барем дел од позитивната атмосфера на турнирот

Од самото формирање на школата за фудбал при ФК ОХРИД ТОП ТИМ како наша основна цел и вредност кон која се стремиме е децата да го засакаат спортот и преку него да создадеме генерации кои пред се ќе ги красат добри човечки особини а потоа и спортска умешност. 

Огромно задоволство ни причинува што многумина ги препознаа тие вредности и помогнаа во создавањето на овој клуб кој веруваме ќе биде дел од многу позитивни животни приказни во иднина. Чувствуваме обврска на сите нив јавно да им се заблагодариме.

Посебно сакаме да ги истакнеме бутици „RICCI“ и продавниците за спортска опрема „LESCON“ кои се со нас од самото наше основање. Нивната безрезервна и несебична поддршка од самиот почеток беше исклучително важна за успешното работење на нашиот клуб. ТИЕ се погрижија секое наше дете да добие комплет клупски дрес со она препознатливо срценце на предниот дел од дресот. Им посакуваме секоја година да бидат се поуспешни. Се надеваме дека нивниот пример ќе го следат и други кои помагајќи го спортот и младите ќе придонесат кон создавање на посветла иднина за сите нас.

Одличен ден за фудбалот во Охрид. Денес, на СРЦ „Билјанини Извори“ во Охрид со сечење лента од страна на градоначалникот Никола Бакрачески и директорот на ЈП „Билјанини извори“ Ристе Мишев, беше отворен теренот за фудбал со вештачка трева. Младите фудбалери на ФК ОХРИД Топ Тим беа дел од оваа свеченост на покана на ЈП Билјанини извори и имаа можност први да одржат тренинг на извонредната подлога која во многу ќе придонесе за унапредување на фудбалот во нашиот град.

Честитки и благодарност до Општина Охрид и Фудбалската федерација на Македонија кои овозможија нашиот град да добие еден од најсовремените фудбалски спортски терени по сите стандарди на ФИФА и УЕФА и се надеваме дека со овој вреден проект ќе се даде дополнителен стимул за развојот на спортот и фудбалот во Охрид.

Заврши детскиот турнир во мал фудбал за генерација 2002, 2004 и 2006 што се играше во СЦ Климент Колески во Охрид од 06 до 08 декември 2014. ФК ОХРИД ТОП ТИМ, по покана на организаторот, ФК Академија Пандев 10 од Охрид играше во сите генерации.

Генерација 2002 како најискусна во играње на турнирски систем на натпревари одигра три одлични меча. Победата од 2:0 врз ФК Тоталфудбал од Ресен и нерешениот резултат со ФК Оск Фер Плеј од Охрид беа недоволни за „Белите“ да се пласираат во полуфиналето на турнирот, најмногу заради единствениот пораз на стартот од ФК Академија Пандев 10 од Охрид.

За ФК ОХРИД ТОП ТИМ – генерација 2002 настапија: Стивен Митрески, Емре Мустафа (1 гол), Емре Дуница, Томи Николоски, Петар Љушкоски, Климент Гиноски (1 асистенција), Филип Митрески, Христијан Китрозоски (2 гола) и Мухамед Јахја Шкор (1 асистенција).

Генерација 2004, по поразот на стартот од екипата на ФК Оск Фер Плеј, одигра мошне ефикасен натпревар со струшки Караорман кој заврши без победник 3:3. Натпреварот кој одлучуваше за пласман во полуфинале несреќно го загубивме од ФК Тоталфудбал Ресен со минимални 0:1 и покрај добрата игра и многуте шанси што ги создадовме.

За ФК ОХРИД ТОП ТИМ играа: Кадир Ибрахим, Иво Спироски, Александар Трпоски,, Филип Филипоски, Наум Јаковлев, Мухамед Јахја Шкор (2 гола), Климент Филев, Јусуф Ариф (2 гола), Хадис Рифат, Халил Ибрахим, Никола Кречов,

Резултатот што го постигна Генерација 2006 од ФК ОХРИД Топ Тим на овој турнир беше под можностите на екипата, но мора да се земе во вид дека  „Белите“ играа во комбиниран состав од играчи родени 2006, 2007 и 2008 година. По поразот од ФК Тотал фудбал Битола, нашите играа крајно неизвесен натпревар со ФК Оск Фер Плеј од Охрид. Иако први поведовме и имавме шанси да го добиеме натпреварот што можеше да не однесе до полуфинале, сепак противникот во последните моменти од мечот успеа да го „сврти“ резултатот за конечни 1:2. По двата порази, нашите фудбалери собраа сили и постигнаа 3 погодоци против ФК Академија Пандев 10 од Охрид во натпреварот што го добија со 3:2. Оваа победа беше доволна за освојување на третото место во групата.

За ФК ОХРИД ТОП ТИМ играа: Бешир Онур, Крлески Петар (2 асистенции), Лолески Михаил, Шопоски Лео, Сеидоски Мухамед (3 гола), Мајкиќ Мартин (1 гол), Јахја Џан, Николовски Матеј (1 асистенција).

ФК ОХРИД ТОП ТИМ ќе учествува на детскиот турнир во мал фудбал што го организира координаторот на ФК Академија Пандев 10 од Охрид, г-н Благој Ристевски. На турнирот, покрај дел од екипите што играат во Детската фудбалска лига – Југозападен регион ќе има и по една екипа од Ресен и Битола.

На покана на организаторот, ФК ОХРИД ТОП ТИМ ќе учествува во сите возрасни категории во кои ќе се играат натпревари и тоа: Генерација 2002, Генерација 2004 и Генерација 2006.

Натпреварите ќе се играат во СЦ „Климент Колески“ Охрид  од 06 до 08 декември 2014.

Најмладите генерации (2005/06/07 и помлади) од ФК ОХРИД денес гостуваа во Битола. Во спортската сала „Павел Шатев“ одиграа неколку пријателски натпревари со домаќинот, екипата на ЛГ Битола. Околу 50-тина гледачи имаа можност да уживаат во фудбалските мајстории на младите фудбалери кои им приредија одличен фудбал со многу акции, атраткивни потези, возбудувања и се разбира голови. Се играше максимално фер и коректно. Победија сите дечиња. Искрено се радуваа на секој постигнат гол. Она што е најважно одлично се забавуваа и се дружеа со нивните врсници од Битола.

За ФК ОХРИД ТОП ТИМ играа: Пацески Петар, Садикоски Амар, Палитов Стефан, Хусеин Јусуф, Лолески Михаил, Саидоски Мухамед, Блажески Валентин (постигна 1 гол), Крлевски Петар, Шопоски Лео, Размоски Дамјан (постигна 1 гол), Мајкиќ Мартин (постигна 1 гол), Јахја Џан и Бешир Онур.

Голема благодарност до нашите пријатели и домаќини, ФШ „ЛГ“ од Битола за нивниот срдчен прием и одличната организација.